1Daesung (Кан Тэ Сон), 32 настай

 

Өдгөө 32 настай Тэ Соны хувьд 2019 оны 11-р сарын 10-нд цэргийн албанаасаа халагдсан билээ. Энгийн амьдрал нь цар тахлын үетэй таарсан ч тэрээр энэ хугацаанд зүгээр суугаагүй бололтой. Энэ оны гуравдугаар сард түүнийг YouTube дээр хаяг нээж, 8 сарын турш контент бүтээж байсныг фэнүүд нь олж мэджээ. 

 

 

D'splay нэртэй суваг дээрээ Тэ Сон бөмбөр тоглож, G-Dragon, WINNER, BLACKPINK-ийн дуунуудаас коверлохын зэрэгцээ төрөл бүрийн ASMR бичлэг оруулсан байна. Гэхдээ ямар ч бичлэг дээр нь түүний царай гараагүй, өөрийнхөө нэрийг дурдаагүй боловч түүний хоолойноос нь BIGBANG-ийн гишүүн мөн гэдгийг хүмүүс мэдсэн аж.

 

2Taeyang (Тун Ён Бэ), 33 настай

 

Бүжгийн чадвар, хоолойны чадлаараа хамтлагийнхнаа тэргүүлдэг Тэ Ян мөн 2019 онд 21 сарын цэргийн албаа дуусгаж, Тэ Сонтой хамт халагдсан юм.

Сүүлийн жилүүдэд тэрээр сүсэг бишрэлдээ ихээр анхаарал хандуулж, Библийн ишлэлүүдээс цахим хаягтаа байнга оруулдаг болоод байв.

 

 

Мөн Тэ Ян хамтлагийн залуусаасаа хамгийн түрүүнд эхнэр, хүүхэдтэй болж, фэнүүдээ баярлуулсан билээ. Тэрээр Солонгосын жүжигчин Мин Хё Ринтэй 2014 онд "1AM” дууныхаа клипний зураг авалтыг хийж байхдаа анх танилцаж, удаан хугацаанд үерхсэний эцэст 2018 онд гэрлэсэн юм. 

Тэгвэл хэдхэн хоногийн өмнө хос хоёр бяцхан хүүтэй болсноо зарлажээ.

 

3T.O.P (Чой Сэнхён), 34 настай

 

BIGBANG-ийн гол рэппер, царайлаг залуу T.O.P хэдий 2018 оны 11-р сард цэргээс халагдах байсан ч марихуан хэрэглэсэн хэрэгт орсноор хоёр жилийн тэнсэн харгалзах ялаар шийтгүүлсэн билээ. Энэ хугацаандаа тэрээр олон нийтийн үйлчилгээнд ажиллах замаар цэргийн албаа дүйцүүлэн хааж, 2019 оны 7-р сард чөлөөлөгдсөн байна.

Энгийн амьдралдаа орсны дараа T.O.P дүрслэх урлагийн салбарт ихэнх цагаа зориулах болжээ. Анх карьераа эхэлснээс хойш орчин үеийн уран зураг цуглуулж эхэлсэн тэрээр өдгөө орлогынхоо 95 хувийг барууны болон дорнын зураачдын бүтээлийг худалдаж авахад зориулдаг гэлцдэг.

 

 

Мөн T.O.P өөрийн уран зургийн цуглуулгаасаа гадна хөрөнгө мөнгөө гайхуулах дуртай. Гурван тансаг харш эзэмшдэг, хуучны үнэтэй дарсны хоббитой түүний нийт хөрөнгийг 23 сая ам.доллар хэмээн Koreaboo мэдээлжээ.

 

4G-Dragon (Квон Жи Ён), 33 настай

 

Хамтлагийн хамгийн алдартай гишүүн G-Dragon хоёр жилийн цэргийн албаа 2019 оны 10-р сарын 26-нд дуусгасан. Халагдаж ирсэн даруйдаа тэр "Nike" брэндтэй хамтран ажиллах гэрээ хийхийн зэрэгцээ өөрийн брэнд "Peaceminusone"-ий коллекцийг сурталчилжээ.

Тэрээр хамтлагийн анд T.O.P-ийн нэгэн адил уран зураг сонирхож, өөрөө ч зураг зурахын зэрэгцээ загварын ертөнцөд тун амжилттай явна.

 

 

Хувийн амьдралын хувьд тэрээр BLACKPINK хамтлагийн Женнитэй үерхээд нэлээн удаж байгаа гэдэг нь албан ёсоор батлагдаагүй л болохоос бараг тодорхой болсон. Тэр хоёр нууцаар уулзаж, нэг нэгнийхээ гэрт зочилж байгааг сэтгүүлчид олон удаа харжээ.

 

5Сюнри (И Сэнхён), 30 настай

 

Хамтлагаасаа гарсан цорын ганц гишүүн болох Сюнригийн хувьд сүүлийн жилүүдэд ресторан, шөнийн клуб ажиллуулахын зэрэгцээ өөрийн гэсэн агентлаг, хөрөнгө оруулалтын олон компанитай болсны ачаар нэлээн хөрөнгөжиж,  Солонгосын "Гэтсби” хочтой болоод байсан ч харамсалтай нь мөн л дуулиант хэрэгт холбогдон нэр хүндээ алдсан билээ. 

Тодруулбал тэрээр хөрөнгө оруулалт татахын тулд гадаадын бизнесмэнүүдийг "Burning Sun" шөнийн клубтээ  биеэ үнэлэгчидтэй зугаацуулж байсан, мөн тухайн клубт мансууруулах бодис хэрэглэх, бэлгийн хүчирхийлэл үйлдэх хэргүүд гарсан нь тогтоогдсон юм.

 

 

Тэрээр YG агентлаг болон хамтлагийн бусад гишүүдийн нэрийг өөрийн холбогдсон дуулианд хутгахгүйн тулд BIGBANG-аас гарч байгаагаа, мөн урлагийн карьертаа ч цэг тавьж байгаагаа зарласан.

Энэ жил шүүхээс түүнийг гэм буруутай гэж үзэн 1.15 воны торгууль оноож, гурван жилийн хорих ялаар шийтгэсэн юм. Одоогоор Сюнри тус шийдвэрийн эсрэг давж заалдаад байгаа аж.

Хувийн амьдралын тухайд тэрээр 2018 оноос хоош жүжигчин Юү Хевон-тэй үерхэж байгаа.

 

 

BIGBANG-ийн гишүүд цэргээс халагдаад "Coachella" фестиваль дээр гурван жилийн дараах албан ёсны эргэн ирэлтээ хийхээр төлөвлөж байсан ч цар тахлын улмаас тус фестиваль цуцлагдсан билээ.

Ямартаа ч тэд YG агентлагтай гэрээгээ шинэчилсэн нь тодорхой болсон тэд удалгүй шинэ хөгжмөөрөө эргэн уулзана гэдэгт фэнүүд нь итгэлтэй байна.