Гэгээн валентины өдрийг мэдэхгүй хүн бараг үгүй болжээ. Хосуудын хайр дурлалыг бататгадаг, хэн нэгэнд хайраа илчлэх боломж олгодог энэ өдөр хүмүүс хайртайгаа илэрхийлж нэгэндээ бэлэг өгөх нь бараг ёс юм шиг л болж. Харин чухам яагаад энэ өдрийг ингэж тэмдэглэх болсон талаар нэгэн сонирхолтой түүхийг хүргэе. 

Эртний Римийн эзэн хаан Клавдий-2 гэгч машид харгис нэгэн хаан 270 онд төр барьж байсан хэцүү цэвүүн тэр цагт цус урсгасан их дайн нь ямар ч амжилт олохгүй байсан тул хаан ихэд бухимджээ. Цэрэг дайчид нь тулааны талбараас уйдаж, тухтай тайван амьдралыг эрхэмлэх болсныг гадарлаж хурим найр хийх, гал голомтоо бадруулахыг хориглосонд дургүйцсэн залуус авралт сайн хүнийг эрж Ромын Терний хотын нэгэн санваартан Валентин гэгчтэй таарчээ.

Залуусын хүсэл сэтгэлийг гүнээ ойлгодог тэр ариун санваартан хэрүүл ам хийдэг эр эмийг эвлэрүүлж, ганц бие хүмүүс бие биедээ хайрын захиа бичиж, цэцэг бэлэглэхийгуриалсан байна. Идэр залуусыг уруу татсан тэрхүү ламтныг ухаан мулгуу, уур хилэнт хаан баривчлан авч 270 оны 2-р сарын 14нд цаазлан гэсгээсэн түүхтэй. 

Санваартан шорон гянданд тарчлан зовж байхад нь шоронгийн даргын сохор боловч гоо сайхан охин ламтанд тусалж асарч байсан тул ламтан түүнд үнэнхүү сэтгэл зүрхээрээ дурлаж, цаазлуулахын өмнө хагацлын захиа бичиж, захианыхаа төгсгөлд "Чиний Валентин” гэж бичээд сарнай цэцэг хавчуулжээ. Уг захидлыг, уншаад хараагүй охин хараатай болж, гоо үзэсгэлэн нь улам гайхам болон гэрэлтжээ.

Тэр цагаас эхлэн орон бүрийн залуус бие биедээ захиа бичиж, дурлал хайраа илэрхийлж цэцэг бэлэглэдэг уламжлалтай болж. Хайр сэтгэлээсээ болж хэлмэгдсэн Валентиныг 496 онд Ромын пап Геласйүс цагаатган хоёрдугаар сарын 14-нийг гэгээн Валентиний өдөр болгон тэмдэглэж байхаар зарлигдсан гэдэг. Үүнээс хойш дэлхий дахин энэ өдрийг тэмдэглэх болсон билээ.

Хосууддаа гэгээн Валентины өдрийн баярын мэнд хүргэе.