Гаалийн байцаагч нар архидан согтуурч нэгийгээ хутгалсан гэв үү?

Өмнөговь аймгийн Гашуунсухайтын боомт дээр энэ сарын 8-ны өдөр буюу өнгөрсөн Даваа гаригт нэгэн ноцтой хэрэг гарсан тухай мэдээлэл цахим орчинд цацагджээ. Энд мэдээлснээр гаалийн байцаагч нар архидан согтуурах үеэр байцаагч н.Батцоож гэгч байцаагч н.Иш-Одыг хутгалсан гэнэ. Маргааны гол үндэс нь Иш-Одыг орлогч дарга Б.Мөнх-Амарын бүх булхай луйврыг нь хийдэг, гарын хүн гэж хэлснээс болсон гэж тайлбарлахын сацуу ямар холбоо сүлбээтэй болон ямар хууль бус үйлдлүүд хийдэг талаар дурдсан байна. Энэхүү мэдээлэлд "Байцаагч Иш-Од нь Б.Асралтын дүүгийнх нь найз юм. Гашуунсухайт боомтынхон аж ахуйн нэгжүүдийг хясан боогдуулах замаар дарамталж авлигал авдаг, улмаар гаалийн лацыг хүртэл дамлан худалддаг талаар хэвлэлээр удаа дараалан гардаг. Сая гарсан гэмт хэрэг ч гаалийн дарга нарын ах дүү, найз нөхөд, нам дамжсан сүлжээгээрээ дамжуулсан авлигал, хууль бус үйлдэлтэй холбоотой. Орлогч дарга Мөнх-Амар нь ГЕГ-аас хуваарилан түр ажиллуулж байгаа байцаагч нараа ялгаварлан гадуурхаж, "ашигтай ”местэндээ өөрийн хүмүүсээ ажиллуулдаг, хувьдаа нүүрсний машинтай байцаагч нараа дэмждэг, хууль ёсны шаардлага тавьсан ажилтнуудаа ГЕГ-ын дарга Б.Асралтаар мундагдуулан өөр боомт руу гэнэт шилжүүлж гэр бүлээс нь холдуулдаг аргатай. Гаалийн байцаагчид өөрсдөө шалгадаг мөртлөө өөрсдөө хувьдаа 2-3 нүүрс тээврийн машинтай, тэднийгээ байнга оочир дайруулж, нүүрс ачиж буулгах талбайнуудын ажилчдыг дарамталж ачуулдаг. Гаалийн байцаагч Эрдэнэтогтох, Жамьянсэнгээ, Бат-Өлзий, Баяр-Өлзий, Эрдэнэбаяр, Нурлан нарын үйлдэл хэрээс хэтэрсэн талаар Цагаан хадны нүүрс ачиж буулгах талбайн ажилтнууд хэлэх үгээ олж ядаж байна.

Энэ тухай хэвлэл мэдээллээр нэг хэсэг шуугидаг ч ямар ч арга хэмжээ авахгүй байсаар замхарч байна. Сү. Батболдын дүү Б.Асралт Гаалийн Ерөнхий газрын дарга болсноор энэ бүх хууль бус зүйл, хулгай луйвар улам цэцэглэж, гаалийг гааль биш болгосныг хэлж байна. Б.Асралтын дагуулж ирсэн сургуулийн анд Баттөр, Сү.Батболдын бие хамгаалагч асан Онон нараар дамжуулан гаалийг авлигажуулж, татваргүй барааны дэлгүүрийн зөвшөөрөл зарж, улсад их хэмжээний хохирол учруулсан мөн аж ахуйн нэгжүүдийг дарамтлан хувь эзэмшдэг болжээ. Үндсэндээ энэ хоёр хүн Ерөнхий газрынхаа газар% хэлтсийн дарга нарын өмнөөс бүх асуудлыг шийддэг болжээ.

Эцэст нь энэ хууль бус үйлдлийг таслан зогсоогоогүйгээс байцаагч нарын дунд хутга шөвөгний асуудал дэгдэж, нэгийгээ хутгалжээ. Болсон үйл явдлыг Гаалийнхан ихэд нууцалж байна. Энэ гэмт хэргийг нуун дарагдуулж, Орлогч дарга Мөнх-Амар машин гаргаж өгч, хутгалуулсан байцаагч Иш-Одыг хотруу эмнэлэгт авчирч хэвтүүлжээ" хэмээн бичжээ.

Энэ мэдээллийн талаар ГЕГ-ын Хэвлэл мэдээлэл сургалт судалгааны төвийн ахлах байцаагч н.Энхбаатараас тодруулсан юм. Тэрбээр "Энэ талаар албан ёсоор мэдэгдэж хэлсэн тодорхой мэдээлэл байхгүй. Сайтуудаар яваад байгаа мэдээлэл худлаа, энэ талаар сайн мэдэхгүй байна. Хүний амь насанд хүрэхээр зүйл огт болоогүй бөгөөд энэ мэдээлэл худлаа, арай хэтрүүлсэн байна лээ. Архи уугаад зодолсон гэх мэдээлэл гарсан байхыг харсан. Асралт даргыг унагаах гэж янз бүрийн мэдээлэл тавиад яваад байдаг. Миний ойлгож байгаагаар манай даргыг харлуулах гэсэн зохион байгуулалтай ажил гэж ойлгоод байгаа. Батцоож, Иш-Од гэх хүмүүс миний шавь нар. Би тэднийг сайн мэднэ, хутга мэсний асуудалд орооцолдох хүмүүс биш. Хоорондын тааламжгүй байдал, үл ойлголцол гаргаж дотор нь хагаралдуулах гэсэн янз бүрийн зүйлс болдог. Энэ бол зохион байгуулалтай зүйл гэж бодож байна. Бидэнд ямар нэгэн асуудал гарахад дотоодын сүлжээгээр мэдээлэл өгдөг. Харин энэ гарсан асуудлаар бидэнд ямар ч мэдээлэл ирээгүй, ийм асуудал байхгүй” гэв.

Мөн тус газрын хэвлэлийн албанаас энэхүү мэдээллийг үгүйсгэсэн юм.

Холбоотой мэдээ

Сэтгэгдэл Cancel reply